الجمعة، 10 أكتوبر 2008

لا تكن مغروراً بعملك

السلام عليكم ورحمة الله وبركاته
والله وحشتوني جداً واوجه الشكر لكل من سأل عني وكان يتذكرني ، واعتذر لكل فرد لم استطع ان اعلق في مدونته أو ارد عليه حتي ولكن اعذروني .
اللهم تقبل منا الصيام والقيام واغفر لنا وللمؤمنين وللمؤمنات والمسلمين والمسلمات الأحياء منهم والأموات .

قال الله تعالي " يأيها الذين أمنوا كتب عليكم الصيام كما كتب علي الذين من قبلكم لعلكم تتقون "
أسأل نفسي وأياكم أولا هل حققتم الهدف الأساسي من الصيام .
هل اصبحنا من المتقين ، هل توقفنا عن ما كنا نقوم به من أشياء تغضب الله ، هل اصبحنا نقوم بالاشياء التي ترضي الله عنا .

طبعا انتو بتقولوا هو احنا دخلنا علي قناة الرحمة والا الناس .
لا فعلا أخوكم الفقير إلي الله سبب انقطاعه عن احبابه وعدم دخولي علي المدونه هو انشغالي أولاً وبصراحه بنفسي ومازلت منشغل بها هل حققت مايرجي مني والإجابه طبعا " لا لم احقق " مازلت غير راضي عن نفسي طبعا مازلت احب نفسي أكثر من حبي للغير مازلت أخشي واحب الدنيا ومتصارع مع الحياه من أجل البقاء وكسب العيش . ومازلت ابحث عن زينة الحياه الدنيا بعدما رزقنا الله بـ " البنون " .
مش عارف انا فعلا مازلت غير راضيا عن نفسي مازالت نفسي ضعيفه احتاج إلي تأديبها ، ولكن هل هذا لوم للنفس أم ماذا أسأل الله أن يعينني علي الطاعه .

الطاعه ليست فقط الصلاة والصيام والقيام والصدقه ، ولكني أري الطاعه هي أن تنزع الدنيا من قلوبنا وتكون في أيدينا يوم نعطي من لايخشي الفقر ، يوم أن نعيش للغير ونقوم ونهب حياتنا لنصرة ديننا .

يارب يارب يارب ياكريم أرزقني حبك وحب من أحبك وحب كل عمل يقربني إلي حبك .

هذا الموضوع تأديباً لنفسي أولا ، ومن اجل احتياجي لكم بالدعاء بظهر لغيب بما يتسني لكم ، ولكم الأجر ومثله ان شاء الله .

ارجو من الله ان تكونوا جميعاً بصحة طيبه وأرجو من الجميع مسامحتي و أن يتذكرني الجميع بالطيب ويغفروا لي ان أسأت إليهم .
أحبكم جميعاً في الله واتمني ان يكتبنا من الصديقين والشهداء وان نجتمع دائماً علي الطاعه وأن يكون خير اجتماعنا يوم نلقي الله ويمتعنا بالنظر إلي وجهه الكريم إن شاء الله .
السلام عليكم ورحمة الله وبركاته

الأربعاء، 20 أغسطس 2008

بعد ما شاب ضربوه بالقبقاب


ايوه فعلا هو ده حالي وحال جميع المدرسين في مصر .
إذا كنت انا اللي لسه ابن امبارح واللي متعين بقالي كام سنه صعبان عليا نفسي امال المدرسين الجهابظه اللي بقالهم اكتر من 25 سنه مدرسين يعملوا ايه في نفسيهم او نفسيتهم .
تصدقوا ان احنا هنمتحن وعاملين لينا لجان وارقام جلوس وهنروح الامتحان بالقلم الرصاص وهتجيلنا امتحانات من مصر وهندخل امتحان 3 ساعات والمرقبيين يقفوا علينا ويمسكونا بالبرشام ربنا يسترها معانا .
ده احنا مذكرناش في الكليه جايين في خلال شهر واحد يمتحنونا .
طيب هيتحنونا في ايه ؟؟؟؟؟؟؟؟؟؟؟؟؟ دي علامات استفهام ودليل علي واحد واقف مدلدل شفته التحتنيه وحاطط دماغه بين كتافه .
طيب هقولكوا حاجه احلي لما زمايلنا المدرسين سألوا انتو هتحطوا التقدير بتاع المدرس علي أي أساس رد السيد المسئول " لم يحدد بعد معيار التقويم " والنبي ده اسمه كلام .
تخيلوا ان الامتحان ده داخله مدرسين وموجهين طالعين معاش السنه الجايه وطبعا عندهم خبره في حل الأسئله لأنها كلها اختيار من متعدد .
واحنا في مصر اجدع ناس نعرف نحل من بين متعدد ( حادي بادي كرنب زبادي ) .
متنسوش تدعولي وللاخوة المدرسين المنكوبين أسف الممتحنين ان ربنا يسهلهلهم كده ويعرفوا يحلو .


تنبيه مش عايز حد يجيلي عند اللجنه ويجيب السندوتشات والعصير والبسكوته لأنه مفيش فسحه الامتحان 3 ساعات مقطوعيه واحده .
ويجعله عامرررررررررررررررررر .

الأربعاء، 6 أغسطس 2008

حكومة ناصحه

السلام عليكم ورحمة الله ازيكو كلكم عاملين ايه الحمد لله عايشين
انهاردة اكلمكو بصفتي واحد مبقوق من الحكومة ايوة من الحكومة ليه بقي ؟
اكلمكو اول بحكم اني واحد مربي اجيال " مدرس يعني " مش مربي فروله المهم خلينا في المهم نيجي نتكلم عن القرار الحكيم بتاع الحكومة بعدم تأجيل الدراسه حتي بعد العيد طبعا رأي حكيم لأنها شايفه ان احنا لما نأجل الدراسة هنبان اما العالم ان المسلمين بتوع شغل مش بتوع كسل وان الصيام يدعو للعمل وليس للكسل والله احنا معاهم ان الاسلام دين عمل بس العالم اللي انتوا خايفين نظهر اقدامه بشكل وحش لمؤاخذه في التعبير طز فيه .
هو انت ياكابتن ياللي ماسك الوزارة معندكش دم مش هامك المصريين وهمك منظرنا امام العالم ومنظر المسلمين من امتي وانت بتخاف علي منظر المسلمين انت كده بتخنق الناس والناس مش ناقصاك لأنهم علي أخرهم ، هو العيل الصغير هيروح المدرسة في الاسبوع الاخراني في رمضان ويصوم لغايه العصر ( صيام الحاجه ) انت مش بتحس .
والا انت عايز تضيع صيام الطلبه والطالبات وخاصه الشباب بتوع الكليات اللي مبيقدروش يمسكو نفسهم وعلي طول بيروحوا يفطرو في الكليه طبعا فطار النظر والحب والموده ( وانتو فاهمين اكيد ) .
خنئتونا حرام عليكم انا كمدرس اول اسبوع دراسة ده ببقي عامل زي الفرخه الدايخه اللي دماغها عامله زي الفيل ببقي ماشي مدلدل وداني وبجرجر رجليا يعني حاله من الشلل اولا من المجهود ثانيا من غباء العيال اللي في المدارس ماهي ناقصه غباء حكومة وغباء عيال .
بس ارجع اقول ان الحق مش علي الحكومة الحق علي رمضان انه جه متأخر اسبوع المفروض كان يجي بدري شويه قبل الدراسة عشان الناس تلحق تصوم .
لحسن كده الناس رايح منها اخر عشر ايام من رمضان اللي فيها ليلة القدر .
حسبنا الله ونعم الوكيل فيكو يا حكومة غبي منه فيه ياللي كل واحد منكو قاعد والا حاسس بالشعب حرام عليكم .

معلش الكلام اخدني ونسيت اقول كل عام وانتم بخير بمناسبه شعبان واقتراب رمضان .
ويجعله عامر .

السبت، 26 يوليو 2008

إعدام فرعون


قال ايه وانا قاعد من شوية بقلب في التلفزيون
لاقيت ناس علي المحور ( قناة المحور ) مش محتاجه ذكاء يعني بيتخانقوا .
اتاري ايه شركة انتاج ايرانية للأفلام الوثائقية عامله فيلم اسمه ايه . ( اعدام فرعون )
انا استغربت وقلت اقعد اسمع ايه الموضوع .
وركزت شوية كده علي غير العاده اتاري مين الفرعون طلع مين ياولاد ، لا مش هو اللي في دماغكوا طلع الرئيس ( السادات )
وعاملين مقدمه في أول الفلم لخالد الاسلامبولي انه اهداء لروحه للانتفام من الخائن والعميل والجاسوس ( انا كنت فاكر زيكوا ) بس طلع الكلام علي السادات تخيلوا ، وكانوا جايبين الناس اللي اتكلمت في الفلم اتاري الناس اللي عامله الفيلم كانت جايبه افلام وثائقية تبع الجزيرة ( قناة الجزيرة يعني ) مش كل شوية افهمكوا افهموها ، واخدين الحوار ومقطعين فيه واخدبن اللي هما عايزين يقولوه بس ،
علي العموم طلع الفلم في الأخر ان الناس كلها بتقول علي السادات انه استحق انه يتقتل ازاي انا معرفش .
طبعا الدم فار في نافوخي طبعا انا مقبلش ان حد يشتم الريس بتاعنا فما بالك بالسادات الرئيس المؤمن رجل الحرب والسلام طبعا انا مش هتكلم هنا علي حبيب الشعب الريس جمال ده مفروغ منه .
العمليه هنا هو احنا بقينا للدرجه دي ايران تشتم السادات و اسرائيل يصطادوا الجنود والصيادين بتوعنا والليبيين يضربونا والكويته يطردونا والسعوديه يجيبوا مكانا الهنود والبنغال ، ده حتي السودان فيها اللي فيها واحنا والا هنا والا الفلسطينيين اللي بيلقونا بالطوب علي الحدود .
فين احنا فين انت فين انتوا فين مصر هي بقت هينه كده ده احنا الأصل .
امتي نجيب حد يرد امتي حد يقول حاجه غير نشجب وندين .
يبقي انت اكيد المصري ازاي المصري .
ياأخي ده الواحد بقي يحط دماغه مطرح رجليه حرام ده انتوا خير اجناد الارض لأنكم في رياط الي يوم الدين بس مين اللي بيفك الرباط حرام عليكو بقه .
ريجعله عامر
معذرة لكل مصري رجل أو أمرأة حره

السبت، 19 يوليو 2008

مدوني بورسعيد



بسم الله الرحمن الرحيم
يمكن هتستغربوا اني كاتب العنوان ده بس انا لازم اعترف بالفضل في هذا المقام لكل مدوني بورسعيد اللي هما اجدع مني يمكن انا هنا بالكلمات دي بوجه اللوم لنفسي اكتر لاني مقدرتش اكون زي هؤلاء المدونين الجدعان سواء اللي من بورسعيد او من خارج بورسعيد واللي نورو بورسعيد في الاجتماع اللي عملوه داخل الارض الباسله بدعوه من الاب الباسل والبطل والعزيز علينا واللي انا فعلا كان نفسي آجي الاجتماع عشان اشوفه واقعد معاه واستفاد منه بجد لأني حاسس ان انا هقعد مع تاريخ بورسعيد ،
انا هنا فعلا باكتب الموضوع ده عشان أتأسف واعتذر لكل مدوني بورسعيد عشان انا مقدرتش اجي بس ان شاء الله الجايات اكتر من الرايحات كان نفسي اشوف ناس كتيرزي الاخت العزيزه داليا ( اهو ده عيبه ) اللي بحس انها كتله نشاط ونفسها تعمل حاجه بجد وان باعتذرلها هي مخصوص يمكن هي عارفه ليه بس فعلا انا مقصدتش ازعلك مني و انا عارف انك يمكن زعلتي شويه مني بس مكنش قصدي انتي نفسك ان الناس تبقي اكتر من كده ومعاكي حق وكان نفسي اشوف برضه طارق الغنام ( البورسعيدي ) اللي اطمنت عليه انه حضر لأني مش شايف انه بيكتب اليومين دول والا بيزورني لعل المانع خير انا معرفش حد تاني يمكن انا قريت في المدونه بتاعت الاخت داليا عن اسماء خلتني فعلا اندم اني مقدرتش اجي الاجتماع وفيه حاجه تانيه خلتني اندم اكتر هي ( التورته ) اصل انا من النوع الأكول واللي هيشوفني هيعرف الكلام ده .
انا فعلا مش قادر اتكلم من الاحراج اللي انا فيه بس علي العموم انا شرفت بأني حسيت اني واحد من المدونين واللي انا بدين لهم بالفضل بعد الله عز وجل ان انا ابقي هنا واكتب معاكو
انا كنت ناوي اكتب موضوع جديد انهارده بس انا شفت اني لازم اقدم الاعتذار اولي للناس اللي بتحب بلدها وارجع اقول ان انا برضه منكم ويجعله عامر .

الخميس، 10 يوليو 2008

مين فين وليه كده


اولاً وقبل اي شئ انا بقدم كل الاعتذار لأخواني سواء بموضوعات جديدة او المشاركة والتعليفات علي موضوعاتكم ويمكن الصيف والحر السبب مش عارف .
اما انهارده مش عارف انا هتكلم علي موضوع كلنا بنتكلم فيه وهو ( انت مش معايا والا ايه ) أصحي .
كل واحد بيقرأ هذا الموضوع لازم يصحي ويفوق ويبقي أمين مع نفسه وعلي فكرة دي اصعب حاجه ان انت تبقي صريح مع نفسك .
كلنا صح حاجه غريبه ان كل واحد بيتكلم شايف نفسه فعلاهو الصح ومفيش غيره وقليل اوي منا اللي بيعترف انه كان غلط وفلان هو اللي صح . انا عارف ان انتو هتقولوا دلوقتي يسلام يعني انت ياخويا اللي صح واحنا اللي غلط طبعا هقولكوا ايه انا اللي صح اه وانتوا برضه صح دي مقدمه طويله وبتوه شويه بس لازم تركز .
اولا : كام واحد فينا شايف نفسه بيحب بلده .
الاجابه اننا كلنا فعلا بتحب بلدنا اقسم بالله مهما كانت قاسيه علينا بس بنموت في ترابها يمكن كلنا بننقم من اللي فيها بس بنحبها .
ثانيا : كام مرة قلت فيها جمله احنا المصريين كده هنفضل كده مصريين
الاجابه ان احنا كل ما بنشوف واحد بيعمل حاجه غلط بنقول الجمله دي مش كده . او لما الحكومه بتعمل قانون جديد بنقول هو احنا ناقصنهم ونبدأ نتكر عليهم مش عارف ليه .
احكي قصه صغيره وظريفه جت في بالي من حوالي اسبوع والدتي كانت راجعه من السعودية " حمد لله عبي سلامتها " فرحت عامل فيها شجيع السيما ورحت المطار ويسلام اتبسط اوي من المطار خصوصا انه كان المطار الجديد .
واللي راح عارف ان هناك زي حاجز من الحديد بين بوابات الوصول وبين المستقبلين يعني حاجه كده حوالي 3 متر ، الناس تسيب الحاجز ده وتعدي عشان تبص علي اقربائهم فيها ايه لو وقفنا حلو يعني مش هيوصلوا .
نرجع تاني كل واحد فينا اللي شايف نفسه صح ياريت يقف مع نفسه ويشوف هو صح والا لأ .
كلنا بنقعد نقول ده ظلم هو مين اللي بيظلم مين ماهو احنا اللي بنظلم بعض عشان احنا ظالمين لنفسنا كلام كتير انا فعلا نفسي اكتبه بس انا عارف ان انتو مليتم من الكلام .
بس انا بأمنك انت وهي ان احنا لازم نتكاتف مع نفسنا اول بعد كده مع بعض عشان نخلي بلدنا اجمل بلد في الدنيا .
اود ان اشكر في النهاية كل من دخل وعلق علي مدونتي كلهم بلا استثناء بس فيه 3 افراد فعلا بحس انهم قريبين جدا مني منهم 2 بلدياتي هما :
1 - داليا " هو ده عيبه " .متزعليش من التأخير
2 - طارق الغنام حبيبي وابن بلدي فعلا .
اما الشخصية الثالثه شخصيه فعلا انا بحبها جدا في الله وهي شخصيه محترمه جدا جدا هي الأخت امل عزت " يوميات " بحس جنبها وهي بتكتب عن التاريخ ان انا معرفش حاجه .
لا مش عايز حد يزعل مني والله انا فعلا بحبكوا كلكوا
ويجعله عامر

الاثنين، 23 يونيو 2008

النظر علي اللاشئ


ساعات كتير اوي الواحد يكون في مشوار او مروح من الشغل وماشي في طريقه او راكب مواصلات او حتي رمي الهلب علي واحد صحبه يوصله في طريقة وهو مروح وفجأه وبدون سابق إنذار تلاقي نفسك بتفتح باب البيت .
هنا بس ممكن تفوق من الغيبوبة اللي انت كنت فيها وصلت هنا ازاي واخدت وقت قد ايه في المشوار تلاقي نفسك فوجئت ان انت وصلت بس مش عارف ايه اللي حصل وانت ماشي ووصلت هنا ازاي .
اتاريك ياريس مش واخد بالك ان انت ماشي تبص علي اللا شئ ماشي وعنيك مفتحه زي الفنجان بس مش عارف بتبص علي ايه بتبص علي نفسك من جواها وعلي احوالك وعلي العيشة اللي انت عايشها او التخطيط لحاجه معينه في دماغك بس في الآخر تلاقي نفسك وصلت ازاي اهو وصلت وخلاص .
هنا السؤال اللي خاطر في بالي هل انا بس اللي كده وقلت لازم اقعد شوية في البلكونه اتفرج علي الناس وهي ماشيه عامله ايه ولاحظت العديد من الملاحظات اللي خلاني لازم اولا واخيراً احمد ربنا سبحانه وتعالي علي نعمة العقل لأني وانا قاعد في البلكونه لاقيت مناظر كتير اوي تخليك تحمد ربنا ان انت وانت ماشي في الشارع مبتعملش زي الناس دي ( او علي الأقل فاكر نفسك كده لان الواحد ممكن يتخيل نفسه انه مبيكلمش نفسه في الشارع ويلاقي نفسه بيتكلم لوحده فعلا ) المهم لاحظت حاله غريبه في المنطقه ان فيه ناس كتير عقلها راح فعلا منها ( الحمد لله الذي عافني) لأ الغرب من كده تلاقي ناس كتيرة اوي محترمة وماشية بتكلم نفسها فعلا والله بجد اقسم بالله وساعات ماشي يتخانق مع حد تاني بس مش موجود اصلا .
لاحظت اكتر الناس ماشية متجهمه كنت افتكر زمان ان الناس ماشيه مبسوطة لكن في هذا الوقت من الزمان الناس ماشية في التوهان ودي الغالبية العظمي من الناس تلاقي نفسك راكب العربيه والناس ماشيه مش شايفة ولا سامعه ويسلام يسلام لو واحد بس قاله بخ يطلع فيه صاروخ بينفس عن اللي جواه حتي لو اضرب في الآخر بس نفس عن اللي جواه .
طبعا انا بستبعد من الناس اللي انا شفتهم الرجاله اللي ماشية بتسلس وتملي نظرها من البنات والموضه بتاعت اليومين دول في البنات تلاقي البت ايه الحجاب نموذج ولابسة البادي بتاعها وهي في الكي جي 2 ولابسه بنطلون استرتش تحت الركبه تقريبا ده كان بتاعها وهي في تانيه ابتدائي لأنه قصير فعلا ولابسة فوقيه الجيبه بتاعت اختها الصغيرة .
طبعا الراجل من دول لازم عنيه تندب فيها صاروخ عشان ميبصش .
اما الستات اللي ماشية في الشارع فاغلب الستات اللي ماشية لاحظت انها بتمشي في الظل جنب الفترينات عشان لما تروح البيت تبدأ تقرف في جوزها وتطلب منه الي هي شافته طبعا جوزها ينزل يمشي في الشارع زي الماشيين وهو مش عارف بيبص فين .
انا عارف ان انا بهرتل بس فعلا هو ده اللي حصل معايا وهو ده اللي بيحصلنا التوهاننننننننننننننننننننننننننن .
ربنا يستر علي الحبه اللي بايقين ويجعله عامر .